ವಧು ಕುಣಿಯುತ್ತಾ ಕಾರಿನಲ್ಲಿ ಮೆರವಣಿಗೆ ಸಾಗುವಾಗ ನಡೆದೇ ಹೋಯ್ತು ದುರಂತ!

ಮುಜಾಫರ್​ನಗರ್​ (ಉತ್ತರ ಪ್ರದೇಶ): ವೇಗವಾಗಿ ಬಂದ ಕಾರು ಮದುವೆ ಮೆರವಣಿಗೆಯತ್ತ ನುಗ್ಗಿದರಿಂದ ವರನ ಸೋದರಸಂಬಂಧಿ ಸ್ಥಳದಲ್ಲೇ ಮೃತಪಟ್ಟು, 12 ಮಂದಿ ಗಂಭೀರವಾಗಿ ಗಾಯಗೊಂಡ ಘಟನೆ ಉತ್ತರ ಪ್ರದೇಶದ ಮುಜಾಫರ್​ನಗರದಲ್ಲಿ ನಡೆದಿದೆ.

ಘಟನೆಗೆ ಸಂಬಂಧಿಸಿದ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್​ ಆಗಿದೆ.

ವಧು ಸನ್​ರೂಫ್​ ಕಾರಿನಲ್ಲಿ ಡ್ಯಾನ್ಸ್​ ಮಾಡುತ್ತಾ ಮದುವೆ ಮಂಟಪಕ್ಕೆ ತೆರಳುತ್ತಿರುತ್ತಾಳೆ. ಕುಟುಂಬದ ಇತರೆ ಸದಸ್ಯರು ಕಾರಿನ ಸುತ್ತ ಕುಣಿಯುತ್ತಾ ಮೆರವಣಿಗೆಯಲ್ಲಿ ಸಾಗುತ್ತಿರುತ್ತಾರೆ. ಈ ವೇಳೆ ಎದುರುಗಡೆಯಿಂದ ವೇಗವಾಗಿ ಬರುವ ಕಾರು ಮೆರವಣಿಗೆಯತ್ತ ನುಗ್ಗುತ್ತದೆ.

ಘಟನೆಯಲ್ಲಿ ಓರ್ವ ವ್ಯಕ್ತಿ ಮೃತಪಟ್ಟಿದ್ದು, 12 ಮಂದಿ ಗಾಯಗೊಂಡಿದ್ದಾರೆ. ಘಟನೆ ಬುಧವಾರ ನಡೆದಿದ್ದು, ವಿಡಿಯೋ ಭಾರಿ ವೈರಲ್​ ಆಗುತ್ತಿದೆ. ಮೃತಪಟ್ಟ ವ್ಯಕ್ತಿಯನ್ನು ವರನ ಸೋದರಸಂಬಂಧಿ ಪ್ರಮೋದ್​ ಕುಮಾರ್​ (42) ಎಂದು ಗುರುತಿಸಲಾಗಿದೆ. ಮಾಹಿತಿ ತಿಳಿದು ಘಟನಾ ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಿದರು.

ಘಟನೆ ಬಗ್ಗೆ ಮಾತನಾಡಿದ ವರ ಅಂಕುಲ್​ ಕುಮಾರ್​, ನಾವು ಪಾರ್ಕಿಂಗ್​ ಬಳಿ ನಿಂತಿದ್ದೆವು. ವಧುವಿನ ಕಾರು ಇನ್ನೇನು ಬಾಂಕ್ವೆಟ್​ ಹಾಲ್​ ಪ್ರವೇಶಿಸಬೇಕಿತ್ತು. ಅಷ್ಟರಲ್ಲೇ ವೇಗವಾಗಿ ಬಂದ ಕಾರು ಜನರತ್ತ ನುಗ್ಗಿತು. ಪರಿಣಾಮ ನನ್ನ ಸೋದರಸಂಬಂಧಿ ಮೃತಪಟ್ಟಿದ್ದು, ಅನೇಕರು ಗಾಯಗೊಂಡಿದ್ದಾರೆ ಎಂದು ತಿಳಿಸಿದ್ದಾರೆ.

ಘಟನೆ ಸಂಬಂಧ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು, ಕಾರನ್ನು ವಶಪಡಿಸಿಕೊಳ್ಳಲಾಗಿದೆ. ಚಾಲಕನ ಪತ್ತೆಗೆ ಬಲೆ ಬೀಸಲಾಗಿದೆ ಎಂದು ಪೊಲೀಸ್​ ಅಧಿಕಾರಿ ಮಾಹಿತಿ ನೀಡಿದ್ದಾರೆ.

Leave a Reply

Your email address will not be published.